في رمضان مسلسلاتك عندنا ......!!!!!

السلام عليكم ورحمة الله وبركاته

يا ترى حتتفرج على أنهي قناة في رمضان ، وحتابع أنهي مسلسل؟

ده
تقريبا مفيش نجم من النجوم إلا وعامل مسلسل جديد ، شكل المسلسلات حتكسر
الدنيا السنة ده ، ورمضان السنة دي حيجي في عز الصيف ، والزهق والملل حيبقى
على الآخر ، وإحنا حنسلي صيامنا في إيه ؟؟ فأكيد حنشوف حاجة نكسر بيها
الملل ، أظن رمضان حيبقى ليه ستايل جديد من السنة ده .




ده
كلام غالب الناس النهاردة ، وبيني بينكم الجو العام صحيح يجيب للواحد
اكتئاب ، فيعني لو فرفشنا حبتين في رمضان والموسم أجازات وصيف يبقى إيه
المانع ؟




أنا معاكم
بس رمضان ضيف غالي ، بيجي بالخير كله من عند ربنا ، لما تتخيل إنك تنجح
النجاح الكبير يوم ما ربنا يعتق رقبتك من النار مش ده يستاهل منك لحظة
تفكير .




لما تلاقي ذنوبك كلها ربنا غفرها ليك وتبدأ صفحة جديدة مع ربنا ، مش ده يحتاج منك قرار مختلف .




لما
تلاقي ربنا يهديك ليلة اللي يقومها صح ، ربنا يعطيه ثواب واحد عبد ربنا
أكثر من 83 سنة متواصلة ، مش محتاجة منك إنك تضحي شوية علشان الفرصة ما
تضيعش منك .




بس
إنت الشيطان بيقولك : إنتي مش بتاعت السكة ده ؟ وده شغل الشيطان إنه يهمدك
ويحسسك بصعوبة الطريق ، وبإنك مش حتبقى مبسوط ولا سعيد ، طيب قولي ، مش
السعادة دي من عند ربنا ، طيب تتصور إنه يديها لمين ، للي بيعصيه ؟؟ ولّا
اللي بيطيعه ، انت مصدق نفسك إنك سعيد ، إنت مسجون ومش حاسس ، إنت " مسلسل "
وإنت مش داري .




وأنا عارف إنك حتقول : وفيها إيه المسلسلات !! دي كمان حرام!!




وأنا
اقولك : تصدق النبي صلى الله عليه وسلم القائل عن رمضان " ما مر بالمسلمين
شهر قط خير لهم منه ، وما مر بالمنافقين شهر قط أشر لهم منه ... إن الله
ليكتب أجره ونوافله ، ويكتب إصره وشقاءه من قبل أن يدخله ، وذاك لأن المؤمن
يعد فيه القوة من النفقة للعبادة ، ويعد فيه المنافق ابتغاء غفلات المؤمنين وعوراتهم فهو غنم للمؤمن يغتنمه الفاجر " [ رواه أحمد في مسنده (2/524 ]
قلي إنت بقى مين المنافق اللي بيبتغي غفلات المؤمنين ، قلي وانت مركز مع
المسلسل في ليلة من الليالي تعتقد إنه الملك لو نزل يعطي جايزة كل ليلة من "
العتق من النيران " إنك حتبقى من أهلها !!! ليه تبيع جوايز الآخرة ؟ ليه ترفض الهدية ؟ ليه متفكرش إنك تضمن أخرتك ؟؟!!




دي
فعلا مسلسلات بتقيد الواحد ، بتكتف الواحد ، بتعيش الواحد من غفلة لغفلة ،
إنتي مش حتعيش صح وانت بعيد عنه ، ليه بتهرب منه ، ليه مش عايز ، ليه
بترفض طريقه ، تعرف إن ربنا بيبسط لكي يده كل ليلة وفي كل نهار علشان تتوب ،
إنتي ممكن ترد يده ؟؟؟




تعرف
إن ربنا بينزل كل ليلة علشان يتوب عليك ويغفرلك ويستجيب دعاءك ، ليه لأ ؟؟
ليه سايب نفسك للدنيا تلعب بيك ؟ الحياة معاه هي الحياة ، سيبك من العيشة
اللي انت عايشها ، ما سمعتش عن " رامي الشمال " نجم ستار أكاديمي اللي كان
بيشوف في المنام إنه ماشي في طريق ضلمة ، وكان عنده 22 سنة ، واتقلبت
عربيته ومات في لمح البصر ، مش ده النجم !! تحب تعيش وتموت زيه ؟؟




وقلي : لأ ليه ؟؟ ليه ما يحصلش ، ما هي نفس العيشة ، ونفس الحياة ، تحب تقابل ربنا إزاي ؟




رمضان
بيهتف فيك " يا باغي الخير أقبل " تعال ، حط إيدك في إيدي ، فكر السنة دي ،
حتصلي القيام فين ؟ وحتقرأ قرآن أد إيه ، حتعمل خير أد إيه ؟؟ حتحاول تكفر
عن ذنوب السنين إزاي ؟ حتجري لربنا ، وتقوله : أنا جايلك يا سيدي ويا
حبيبي ويا مولاي ، أنا مش حسيب سكتك تاني ، يا رب لو حارجع للي أنا فيه :
اقبضني في رمضان غير مفتون بعد ما تتوب عليَّ .
يلا
بينا كلنا نقول : "إني ذاهب إلى ربي سيهدين " كلنا حنجدد توبتنا ، حنقاطع
كل اللي بيسلسلنا ، أنا عايز قلب جديد ، أنا عايز أبقى إنسان اتولد من جديد
، وولادته في رمضان السنة دي ان شاء الله .

تسلم ايدك يا كازلو

بجد انا كنت محضر لك رد جامد اول م قرات العنوان بس بجد تسلم ايدك
ياواد لان الكلام ده بقى حاجه تجنن لانهم عملوا 108 مسلسل تعرض فى رمضان السنه دى
وكأن الشيطان بيقول لنا خلاص ملكوش حجه صيامكو هيضيع يعنى هيضيع
وبصراحه يا جماعه انا عازره لانه ميبقاش شغال وطالع عين امه طووووول
السنه ويجى تعبه كله يضيع ف الشهر ده مش معقول يعنى الكلام ده
بس بجد تسلم يا كازلو وربنا يتقبل منا جميعا

مرسى يا حوريه

هههههههه

مرسى يا باش مهندس على الرد والمشاركه الحلوه دى

توبيك جامد بجد كازلو
تسلم ايدك يا برنس